UBubiligi n’u Rwanda biri kunoza umubano wabyo mu rwego rwa dipolomasi
Tariki ya 22 Nzeri 2026, ibihugu byombi byatangaje ko byasubukuye umubano wari warahagaze muri Werurwe umwaka ushize, nyuma y’aho Minisitiri Nduhungirehe na mugenzi we w’u Bubiligi, Maxime Prévot, bahuriye i New York ku cyicaro gikuru cy’Umuryango w’Abibumbye, aho bari bitabiriye inama y’Inteko Rusange yawo.
Ibi bihugu byashimiye Leta ya Qatar yagize uruhare mu nama ya mbere y’ubwiyunge yahurije Minisitiri Nduhungirehe na Prevot i Doha tariki ya 2 Kamena 2026, bigaragaza ko bizakomeza kuganira nubwo byemera ko hari ibibazo byo ku rwego mpuzamahanga bitumva kimwe.
Mu kiganiro Minisitiri Nduhungirehe yagiriye ku muyoboro Agasaro Kaburaga, yasobanuye ko icyatumye uyu mubano uhagarara atari uko u Rwanda rutumvikanaga n’u Bubiligi, ahubwo ko byatewe n’uko iki gihugu cy’i Burayi cyari gikomeje gusaba imiryango mpuzamahanga kurufatira ibihano.
Yagize ati “Ntabwo ari uko tutumvikana ku kibazo cy’intambara y’iburasirazuba bwa Congo. Ntabwo ari u Bubiligi bwonyine tutumvikana. Hariho n’ibindi bihugu by’i Burayi na Amerika tutumvikana.”
Minisitiri Nduhungirehe yagaragaje ko mu gihe kirenga umwaka gishize, u Rwanda rwasanze u Bubiligi bwagabanyije gusaba imiryango mpuzamahanga kurufatira ibihano bushingiye ku bibazo rufitanye na Repubulika Iharanira Demokarasi ya Congo.
Ati “Mu mwaka umwe n’igice ushize, ibyo u Bubiligi bwakoraga mu miryango mpuzamahanga byari byaragabanyutse kurusha uko byari bimeze mbere. Hari raporo twabonaga y’uko batagifite ubukana nk’ubwa kera mu kwibasira u Rwanda. Ni byo byanaduhaye icyizere y’uko wenda dushobora kuzasubukura umubano, ibyo tutumvikanaho tukabiganiraho.”
Minisitiri Nduhungirehe yatangaje ko mbere y’uko umwaka urangira, ambasade z’ibihugu byombi zizaba zafunguwe, hashyizweho ba Chargés d’Affaires mbere y’uko ba Ambasaderi bashyirwaho mu mwaka utaha.
U Rwanda n’Ububiligi bivuga ko bishimishijwe no gusubizaho umubano wa dipolomasi, nyuma y’umwaka urenga bicanye uwo mubano ndetse bikirukana abadipolomate b’impande zombi.
Ibihugu byombi byatangaje icyo cyemezo ku wa kabiri mu itangazo rihuriweho ryashyizweho umukono na Minisitiri w’ububanyi n’amahanga w’u Rwanda Olivier Nduhungirehe na Minisitiri w’ububanyi n’amahanga w’Ububiligi Maxime Prévot.
Bavuze ko ari icyemezo cyafashwe bijyanye n’ibiteganywa n’ingingo ya kabiri yo mu masezerano mpuzamahanga y’i Vienne muri Autriche agenga umubano wa dipolomasi w’ibihugu, kandi ko gikurikiye inama no kuganira byagiye bibaho hagati yabo mu mezi ya vuba aha ashize.
Ingingo ya kabiri y’ayo masezerano y’i Vienne ivuga ko ishyirwaho ry’umubano wa dipolomasi hagati y’ibihugu, ndetse n’ababihagarariye mu buryo buhoraho, “biba ku bwumvikane bw’impande zombi”.
U Rwanda n’Ububiligi – kimwe mu bihugu bibiri byahoze birukoloniza – byari byacanye umubano muri Werurwe (3) mu mwaka wa 2025 ku mpamvu zifitanye isano n’intambara yo mu burasirazuba bwa Repubulika ya Demokarasi (DRC), aho u Rwanda rushinjwa gufasha umutwe w’inyeshyamba wa M23 urwanya ubutegetsi bw’icyo gihugu. U Rwanda rwakomeje kubihakana ruvuga ko rwashyizeho “ingamba z’ubwirinzi”.
Rutamu Shabakaka
9,846 total views, 9,846 views today
