Kenya:Covid-19 yatumye Abanyamerika basubika ubukerarugendo

Leta Zunze Ubumwe za Amerika yagiriye abaturage bayo inama yo kudakorera ingendo muri Kenya ngo kuko bishobora kubashyira mu byago byo kwandura Covid-19 ndetse bakaba bahurirayo n’ibindi bibazo biturutse ku mutekano muke.

Mu itangazo Ikigo cya Leta Zunze Ubumwe za Amerika gishinzwe kurwanya ibyorezo (CDC) cyashyize hanze ku wa 7 Mata 2021, cyavuze ko ubwandu bwa COVID-19 buri hejuru muri Kenya cyemeza ko bishobora gushyira mu byago abahakorera ingendo.

Iri tangazo rigira riti “Abagenzi bakwiye kwirinda gukorera ingendo muri Kenya. Kubera uburyo ibintu bimeze muri Kenya n’abagenzi bakingiwe bashobora kugira ibyago byo kwandura cyangwa gukwirakwiza ubwoko bushya bwa COVID-19, bakwiye kwirinda kujya muri Kenya.”

Iri tangazo ryakurikiwe n’irya Minisiteri y’Ububanyi n’Amahanga ya Leta Zunze Ubumwe za Amerika yavuze ko uretse COVID-19 abaturage b’iki gihugu bakwiriye kwirinda kujya muri Kenya kubera ibibazo by’iterabwoba, gushimuta abantu ndetse n’ibindi byaha.”

Ubwandu bwa COVID-19 buri kugenda burushaho kwiyongera muri Kenya, ibintu byatumye muri Werurwe 2021 Perezida w’iki gihugu, Uhuru Kenyatta, afata icyemezo cyo gushyira Nairobi n’utundi duce tune muri Guma mu Rugo.

Kugeza ubu CDC yashyize Tanzania, Somalia, Ethiopia, Burundi na Tanzania ku rutonde rw’ibihugu aho umuntu aba afite ibyago byinshi byo kwandura COVID-19.

Kugeza ku wa 7 Mata umubare w’abanduye COVID-19 muri Kenya warengaga ibihumbi 141 barimo 1523 banduye mu masaha 24.

 

Leta Zunze Ubumwe za Amerika zasabye abaturage bazo kutajya muri Kenya ngo kuko bashobora kuhandurira COVID-19 cyangwa bikabashyira mu bindi bibazo bishobora guterwa n’umutekano muke / Ifoto: The Nation

 


Leave a Reply

Your email address will not be published. Required fields are marked *