Ngo abagabo baracyahohoterwa n’abagore babo bitwaje uburinganire
Bamwe mu bagabo baganiriye n’ikinyamakuru Gasabo bagaragaje ko iryo hohoterwa bakorerwa n’abagore bashakanye binyuze mu kubabwira amagambo abahoza ku nkeke, ubusinzi ndetse n’ubusambanyi.
Muvala wo mu Murenge wa Kimisagara mu Karere ka Nyarugenge yatanze ubuhamya agaragaza ko amaze imyaka isaga umunani, akorerwa ihohoterwa.Kimwe n’abandi bagabo bo mu mujyi wa Kigali bavuga ko abagore muri iki gihe badatinya no kubakubita bitwaje ko bahawe ijambo mu cyizwe uburinganire.Aba bagabo bagihura n’ihohoterwa bakorerwa n’abo bashakanye ngo bahisemo kwicecekera banga gusekwa n’abaturanyi babo ndetse na bamwe mu bayobozi b’inzego zibanze.
Ubushakashatsi bwanagaragaje ko 46% by’abagore bashatse na 18% by’abagabo bashatse, bahuye na rimwe mu ihohoterwa ririmo gukubitwa, irishingiye ku gitsina cyangwa irishingiye ku mitekerereze yo mu mutwe.
Imibare y’Ikigo cy’Igihugu cy’Ibarurishamibare igaragaza ko mu 2024 abagabo bakorewe ihohoterwa rishingiye ku gitsina bikamenyekana muri Isange One Stop Center ari 3.233.
Muri aba harimo abagabo 485 bakorewe ihohotera rishingiye ku gitsina rigizwe n’ibikorwa byo kubabaza umuntu bishingiye ku gitsina. Abandi 485 bakorewe ihohotera rushingiye ku gitsina rigizwe n’ibikorwa byo kubabaza umubiri.
Mu mwaka wa 2023 abagabo bari bakorewe ihohoterwa rishingiye ku gitsina muri rusange bari 3.214. Barimo 349 bakorewe ihohotera rishingiye ku gitsina rigizwe n’ibikorwa byo kubabaza umuntu bishingiye ku gitsina, n’abandi 2.865 bakorewe ihohotera rishingiye ku gitsina rigizwe n’ibikorwa byo kubabaza umubiri.
Mu 2019 abagabo bakorewe ihohoterwa rishingiye ku gitsina muri rusange bikamenyeshwa Isange One Center bari 1.701, mu 2020 baba 2.364, mu 2021 bagera kuri 2.527.
Mu 2022 abagabo bakorewe iri hohoterwa bari 2.724, mu 2023 baba 3.214, mu gihe mu 2024 bageze kuri 3.233.
Ku bijyanye n’abagore, mu 2024 abakorewe ihohoterwa rishingiye ku gitsina bikamenyekana muri Isange One Stop Center ni 23.152, mu gihe mu 2023 bari 21.605.
Muri Mutarama 2025 Ubushinjacyaha Bukuru bw’u Rwanda bwatangaje ko mu mwaka wa 2024 bwakurikiranye amadosiye 8.129 y’abakekwaho ibyaha bifitanye isano n’ihohoterwa rishingiye ku gitsina, aho yakurikiranywemo abantu 8.222.
Uwitonze Captone
6 total views, 6 views today
