Agaciro ka ‘Diamant’ ya mbere nini ihenze mu myaka 100 ishize

Ikompanyi ikora ubucukuzi bw’amabuye y’agaciro izwi nka ‘Lucara Diamond Corp’, yagurishije iryo mu bwoko bwa ‘Diamant’ ryanditse amateka ku isoko mpuzamahanga yo kugurwa ku giciro gihanitse kuva mu myaka ijana ishize.

Iyi diamant yiswe ‘Lesedi La Rona’ bishatse kuvuga ‘Urumuri rwacu’, yacukuwe mu kirombe cya Karowe muri Botswana mu Ugushyingo 2015. Yabanje gushyirwa mu cyamunara muri Kamena 2016 ariko ntiyagurwa.

Lesedi La Rona yaje kwegukanwa n’Ikompanyi yo mu Bwongereza icuruza imitako, Graff Diamonds, yayiguze nyuma yo kugura indi yo mu bwoko bwa ’373 carat diamond’, agace gato kari kayigize, itanze miliyoni 53 z’amadolari ya Amerika.

Umuyobozi wa Graff Diamonds, Laurence Graff yatangaje ko bishimiye kwegukana iyo diamant idasanzwe.

Yagize ati “Iri buye rifite agaciro gakomeye, tuzarifata neza turyiteho uko bikwiye mu gihe cyo kuribyaza umusaruro. Ibi ni ibihe bidasanzwe mu rugendo rw’ubu bucuruzi kandi nishimiye ko ubwiza karemano bwa Lesedi La Rona.”

Iri buye ryagurishijwe mu gihe Guverinoma ya Botswana yari iri kwiga ku mushinga w’itegeko riha Leta ububasha bwo kugura diamant zidasanzwe nka Lesedi La Rona yagaragaye mu kirombe cya Karowe mu myaka ibiri ishize.

Lukara Diamond Corp. ifite icyicaro gikuru cyayo mu Mujyi wa Vancouver, izwiho kugurisha amabuye y’agaciro y’agatangaza kandi manini amenshi muri yo ikura muri Karowe.

Amafaranga iki kigo cyakuye mu bucukuzi bw’amabuye y’agaciro aho cyagurishije diamant eshatu zirimo iya Lesedi, Constellation na 373 zatanzweho asaga miliyoni 130$.

Abahanga mu by’ubucuruzi bwa diamant bari biteze ko ishobora gutangwaho miliyoni 75 z’amadolari ubwo yashyirwaga ku isoko mu 2016, ubu yitezweho kuzamura ubukungu bwa Graff Diamonds yayegukanye burundu mu mpera z’ukwezi gushize.

Ubwiza bwa Diamant ntibujyana n’ubunini kuko mu 2016, Lukara yagurishije Diamant nto ya 813-carat Constellation kuri miliyoni 63 z’amadolari; yaguzwe n’Ikompanyi yo mu Mujyi wa Dubai yitwa Nemesis International DMCC nkuko Bloomberg yabitangaje.

Lesedi La Rona ni nto ugereranyije n’agapira bakinisha umukino wa Tennis, gusa iza ku mwanya wa kabiri mu bunini, nyuma y’iyitwa Cullinan yabonetse muri Afurika y’Epfo mu 1905.

 1,414 total views,  1 views today

Leave a Reply

Your email address will not be published. Required fields are marked *